பெத்த மகளையே நரபலி கொடுத்த கொடூரத் தாய்! மகனைக் காப்பாற்ற மாபாதகம்.. ஜார்கண்டில் அதிரவைக்கும் பின்னணி! பெற்ற தாயே தனது மகளை நரபலி கொடுத்த சம்பவம் ஜார்கண்ட் மாநிலத்தில் பெரும் பரபரப்பை ஏற்படுத்தியுள்ளது.
“பெற்ற மனம் பித்து, பிள்ளை மனம் கல்லு” என்பார்கள். ஆனால், இங்கு ஒரு தாயின் மனம் கல்லாகி, பெற்ற மகளையே பலிகொடுத்திருப்பது மனிதநேயத்தையே கேள்விக்குறியாக்கியுள்ளது. மூடநம்பிக்கையின் உச்சத்தால் ஒரு பிஞ்சு உயிர் பறிபோன அந்தப் பயங்கரமான பின்னணியை இங்கே காண்போம்.
ஜார்கண்ட் மாநிலம் ஹசரிபாக் பகுதியைச் சேர்ந்தவர் ரேஷ்மி தேவி (55). இவருக்கு 12 வயதில் ஒரு மகளும், ஒரு மகனும் உள்ளனர். ரேஷ்மியின் கணவர் பிழைப்புக்காக மகாராஷ்டிராவில் வேலை பார்த்து வருகிறார். இந்நிலையில், ரேஷ்மியின் மகனுக்குச் சமீபத்தில் உடல்நலக்குறைவு ஏற்பட்டுள்ளது. மகனைக் குணப்படுத்த மருத்துவமனைக்கு அழைத்துச் செல்வதற்குப் பதிலாக, சாந்தி தேவி என்ற பெண் மந்திரவாதியை ரேஷ்மி நாடியுள்ளார். அதுதான் இந்த ஒட்டுமொத்த விபரீதத்திற்கும் தொடக்கப்புள்ளியாக அமைந்தது.
மந்திரவாதியின் தூண்டுதலும்.. தாயின் முடிவும்!
மந்திரவாதி சாந்தி தேவி, ரேஷ்மியின் குடும்பப் பிரச்சினைகளையும், மகனின் உடல்நிலையையும் கேட்டுவிட்டு ஒரு கொடூரமான யோசனையை வழங்கியுள்ளார். “உன் மகனின் உயிர் பிழைக்க வேண்டும் என்றால், உன் குடும்பத்தில் உள்ள தோஷங்கள் நீங்க வேண்டும். அதற்கு ஒரு கன்னிப் பெண்ணை நரபலி கொடுக்க வேண்டும். உன் 12 வயது மகளே அதற்குச் சரியானவள். அவளைப் பலிகொடுத்தால் தெய்வம் சாந்தியடையும், உன் மகன் பிழைப்பான்” என்று மூளைச்சலவை செய்துள்ளார்.
மூடநம்பிக்கையில் மூழ்கியிருந்த ரேஷ்மி, தனது மகனின் நலனுக்காகப் பெற்ற மகள் என்றும் பாராமல் அவளைக் கொல்லச் சம்மதித்துள்ளார். இதற்காகத் தனது ரகசியக் காதலன் பீம்ராம் என்பவரின் உதவியை நாடியுள்ளார். கடந்த மாதம் 24-ஆம் தேதி, துர்காஷ்டமி அன்று இந்த நரபலித் திட்டத்தை அரங்கேற்ற அவர்கள் முடிவு செய்தனர்.
துடிக்கத் துடிக்க நடந்த கொலை: பிறப்புறுப்பில் குச்சி!
மந்திரவாதி சாந்தி தேவியின் வீட்டிற்குச் சிறுமியை அழைத்துச் சென்ற அவர்கள், அங்கு முதற்கட்டப் பூஜைகளை நடத்தியுள்ளனர். பின்னர் அருகில் உள்ள மூங்கில் தோப்பிற்குச் சிறுமியை அழைத்துச் சென்றனர். அங்கு தாய் ரேஷ்மி தேவி தனது மகளின் கால்களைக் கெட்டியாகப் பிடித்துக்கொள்ள, காதலன் பீம்ராம் அந்தச் சிறுமியின் கழுத்தை நெரித்துக் கொடூரமாகக் கொலை செய்துள்ளார்.
சிறுமி இறந்த பிறகு, மந்திரவாதி சொன்ன சடங்குகளுக்காக அந்தச் சிறுமியின் பிறப்புறுப்பில் மரக்குச்சியைச் செலுத்தி வக்கிரமாக நடந்து கொண்டுள்ளனர். மேலும், ரத்தம் எடுப்பதற்காகச் சிறுமியின் தலையில் பலமாகத் தாக்கியுள்ளனர். சடங்குகள் முடிந்ததும், சிறுமியின் உடலை அங்கேயே குழிதோண்டிப் புதைத்துவிட்டு, ஏதுமே தெரியாதது போல வீட்டிற்குத் திரும்பியுள்ளனர்.
நாடகமாடிய தாய்: போலீஸார் விரித்த வலை!
மகளைக் கொன்று புதைத்த பிறகு, ரேஷ்மி தேவி தனது மகளைக் காணவில்லை என்று ஊர் முழுவதும் அழுது நாடகமாடியுள்ளார். போலீஸிலும் புகார் அளித்தார். போலீஸார் தனிப்படை அமைத்துச் சிறுமியைத் தேடி வந்தனர். ஆனால், விசாரணையின் போது ரேஷ்மி முன்னுக்குப் பின் முரணாகப் பேசியது போலீஸாருக்குச் சந்தேகத்தை ஏற்படுத்தியது.
ரேஷ்மியைத் தனி அறையில் வைத்து போலீஸார் துருவித் துருவி விசாரித்தபோது, அவர் செய்த கொடூரச் செயலை ஒப்புக்கொண்டார். “மந்திரவாதி சொன்னார், அதனால்தான் மகளைக் கொன்றேன்” என்று அவர் கூறியதைக் கேட்டு போலீஸாரே அதிர்ந்து போயினர். இதையடுத்து ரேஷ்மி தேவி, அவரது காதலன் பீம்ராம் மற்றும் மந்திரவாதி சாந்தி தேவி ஆகிய மூவரையும் போலீஸார் கைது செய்தனர்.
சமூகத்தின் அவலம்: விழிப்புணர்வு எங்கே?
21-ஆம் நூற்றாண்டிலும் இத்தகைய நரபலிச் சம்பவங்கள் நடப்பது வேதனையான ஒன்று. மருத்துவ வசதிகள் பெருகியுள்ள காலத்தில், உடல்நலக் குறைவிற்கு மந்திரவாதிகளை நாடுவதும், மூடநம்பிக்கைக்காகச் சொந்தப் பிள்ளைகளையே பலிகொடுப்பதும் கண்டிக்கத்தக்கது. இந்தக் கொடூரச் சம்பவம் ஜார்கண்ட் மாநிலத்தை மட்டுமன்றி ஒட்டுமொத்த இந்தியாவையுமே உலுக்கியுள்ளது.
