Australia ODI Squad: பாகிஸ்தானில் சுற்றுப்பயணம் செய்து 3 போட்டிகள் கொண்ட ஒருநாள் தொடரில் ஆஸ்திரேலிய அணி விளையாட உள்ளது. இந்தத் தொடருக்காக ஆஸ்திரேலிய கிரிக்கெட் வாரியம் தனது முன்னணி வீரர்கள் பலருக்கு அதிரடியாக ஓய்வு அளித்துள்ளது. முற்றிலும் இரண்டாம் நிலை வீரர்களைக் கொண்ட அணியை ஆஸ்திரேலியா தற்போது அறிவித்துள்ளது ரசிகர்களிடையே பெரும் விவாதத்தை ஏற்படுத்தியுள்ளது.
சமீபகாலமாக பாகிஸ்தான் கிரிக்கெட் அணி சர்வதேச அரங்கில் தொடர்ந்து மிக மோசமான ஆட்டத்தை வெளிப்படுத்தி வருகிறது. இதனால் ஆஸ்திரேலியாவின் ‘ஏ’ அணியே அவர்களை எளிதாக வீழ்த்திவிடும் என்ற அலட்சியப் போக்கில் ஆஸ்திரேலிய வாரியம் இந்த முடிவை எடுத்துள்ளதாகக் கூறப்படுகிறது. ஆஸ்திரேலியாவின் இந்த பலவீனமான அணித் தேர்வு பாகிஸ்தான் ரசிகர்களைக் கடுமையாகக் கோபப்படுத்தியுள்ளது.
ஐபிஎல் 2026 தொடருக்காக முன்னணி வீரர்களுக்கு ஓய்வு!
தற்போது இந்தியாவில் விறுவிறுப்பாக நடைபெற்று வரும் ஐபிஎல் 2026 தொடரில் விளையாடி வரும் முன்னணி ஆஸ்திரேலிய வீரர்கள் யாருக்கும் இந்த பாகிஸ்தான் தொடரில் விளையாட அழைப்பு விடுக்கப்படவில்லை. அவர்கள் ஐபிஎல் தொடரில் முழுமையாகப் பங்கேற்பதை உறுதி செய்யும் வகையில், ஆஸ்திரேலியா தனது அடுத்தகட்ட இளம் வீரர்களை பாகிஸ்தானுக்கு அனுப்ப முடிவு செய்துள்ளது.
பாகிஸ்தான் மற்றும் ஆஸ்திரேலியா அணிகளுக்கு இடையேயான இந்த ஒருநாள் தொடர் வரும் மே 30-ம் தேதி ராவல்பிண்டியில் தொடங்குகிறது. ஆனால், அதற்கு அடுத்த நாளான மே 31-ம் தேதி ஐபிஎல் 2026 தொடரின் இறுதிப்போட்டி பிரம்மாண்டமாக நடைபெற உள்ளது. இதனால் ஆஸ்திரேலிய அணியின் முக்கிய தூண்களான வீரர்கள் ஐபிஎல் பிளே-ஆப் சுற்றில் பிஸியாக உள்ளனர்.
ஆஸ்திரேலிய அணியின் கேப்டன் பேட் கம்மின்ஸ், டிராவிஸ் ஹெட் மற்றும் ஜோஷ் ஹேசில்வுட் ஆகியோர் ஐபிஎல் தொடரில் விளையாடுவதால் அவர்களுக்கு ஓய்வு அளிக்கப்பட்டுள்ளது. மேலும், அடுத்தடுத்து வரவுள்ள முக்கிய டெஸ்ட் போட்டிகளைக் கருத்தில் கொண்டு, முன்னணி வேகப்பந்து வீச்சாளர் மிட்செல் ஸ்டார்க்கிற்கும் இந்த ஒருநாள் தொடரிலிருந்து முழு ஓய்வு வழங்கப்பட்டுள்ளது.
Australia ODI Squad: 19 வயது இளம் வீரருக்கு வாய்ப்பு: கேப்டன் மாற்றம்
ஆஸ்திரேலிய அணிக்கு மற்றொரு பெரிய பின்னடைவாக, இந்தத் தொடரின் கேப்டனாக அறிவிக்கப்பட்டிருந்த மிட்செல் மார்ஷ் காயம் காரணமாகத் தொடரிலிருந்து விலகியுள்ளார். அவருக்குப் பதிலாக விக்கெட் கீப்பர் ஜோஷ் இங்லிஸ் புதிய கேப்டனாக நியமிக்கப்பட்டுள்ளார். ஸ்டீவ் ஸ்மித், கிளென் மேக்ஸ்வெல் மற்றும் மார்கஸ் ஸ்டோய்னிஸ் ஆகியோர் ஏற்கனவே ஒருநாள் போட்டிகளில் இருந்து ஓய்வு பெற்றுவிட்டனர்.
இதன் காரணமாக ஆஸ்திரேலிய அணி கிட்டத்தட்ட முற்றிலும் புதிய முகங்களுடன் பாகிஸ்தான் அணியை எதிர்கொள்ளத் தயாராகி வருகிறது. இந்த அணியில் 19 வயதான இளம் திறமைசாலி ஆலி பீக் போன்ற வீரர்களுக்கும் சர்வதேச போட்டியில் விளையாட முக்கிய வாய்ப்பு வழங்கப்பட்டுள்ளது. இதனால் ஆஸ்திரேலிய அணி பாகிஸ்தானை சாதாரணமாக நினைப்பதாக விமர்சனங்கள் எழுகின்றன.
தங்கள் நாட்டுடன் நடக்கும் சர்வதேசத் தொடரை விட ஐபிஎல் தொடருக்கு ஆஸ்திரேலியா அதிக முக்கியத்துவம் அளிப்பதாகப் பாகிஸ்தான் ரசிகர்கள் சமூக வலைதளங்களில் கதறி புலம்பி வருகின்றனர். எனினும், வீரர்களின் பணிச்சுமை மேலாண்மை (Workload Management) காரணமாகவே இந்த முடிவு எடுக்கப்பட்டதாக ஆஸ்திரேலிய கிரிக்கெட் வாரியம் தனது விளக்கத்தில் தெரிவித்துள்ளது.
ஆஸ்திரேலிய அணி: ஜோஷ் இங்லிஸ் (கேப்டன்), அலெக்ஸ் கேரி, நேதன் எல்லிஸ், கேமரூன் கிரீன், மேத்யூ குன்னெமன், மார்னஸ் லபுசேன், ரிலே மெரிடித், ஆலி பீக், மேட் ரென்ஷா, தன்வீர் சங்கா, லியாம் ஸ்காட், மேத்யூ ஷார்ட், பில்லி ஸ்டான்லேக், ஆடம் ஜம்பா.
அடுத்தவனப் பேச உனக்கு என்ன தகுதி இருக்கு? – ஹேமங் பதானியை வெளுத்து வாங்கிய ஸ்ரீகாந்த்
