Daryl Mitchell 3rd ODI century vs India: ராஜ்கோட் மைதானத்தில் நடைபெற்ற நியூசிலாந்துக்கு எதிரான இரண்டாவது ஒருநாள் போட்டியில், இந்திய அணி கே.எல்.ராகுலின் அபார சதத்தையும் மீறி தோல்வியைத் தழுவியுள்ளது. இந்திய மண்ணில் நியூசிலாந்து அணி வெற்றிகரமாகத் துரத்திப் பிடித்த (Chase) அதிகபட்ச ஸ்கோர் என்ற புதிய வரலாற்றுச் சாதனையை இந்தப் போட்டியில் கிவிஸ் படைத்துள்ளது. இதன் மூலம் மூன்று போட்டிகள் கொண்ட இந்தத் தொடர் தற்போது 1-1 என்ற கணக்கில் சமநிலையில் உள்ளது.
முதலில் பேட்டிங் ஆடிய இந்திய அணி, டாப் ஆர்டர் பேட்ஸ்மேன்களின் சொற்ப ரன்களால் பெரும் சரிவைச் சந்தித்தது. எனினும், மிடில் ஆர்டரில் ‘கிளாஸ்’ ஆட்டத்தை வெளிப்படுத்திய கே.எல்.ராகுல், இந்திய அணியின் மானத்தைக் காப்பாற்றும் வகையில் ஒரு கௌரவமான ஸ்கோரை எட்ட உதவினார். இந்தப் போட்டியின் முக்கியத் தருணங்கள் மற்றும் தோல்விக்கான காரணங்கள் குறித்து விரிவாகக் காண்போம்.
ராகுலின் ‘ராஜ்கோட் வித்தை’: ஒற்றை ஆளாக நின்று சதம் விளாசிய நாயகன்!
டாஸ் வென்ற நியூசிலாந்து அணி முதலில் பந்துவீச்சைத் தேர்வு செய்தது. இந்திய அணியின் தொடக்க வீரர் ரோகித் சர்மா 24 ரன்களில் ஆட்டமிழந்து ஏமாற்றினார். அவரைத் தொடர்ந்து களமிறங்கிய சுப்மன் கில் நிதானமாக ஆடி 56 ரன்கள் சேர்த்தார். ஒரு மிகப்பெரிய சாதனையைப் படைப்பார் என்று எதிர்பார்க்கப்பட்ட விராட் கோலி, ஆறாவது முறையாகத் தொடர்ந்து 50 ரன்கள் அடிக்கும் முதல் இந்திய வீரர் என்ற வாய்ப்பைத் தவறவிட்டு, வெறும் 23 ரன்களில் வெளியேறினார். ஸ்ரேயாஸ் ஐயரும் 8 ரன்களில் வெளியேற, இந்தியா 150 ரன்களையாவது தாண்டுமா என்ற சந்தேகம் எழுந்தது.
அந்தச் இக்கட்டான சூழலில் களமிறங்கிய கே.எல்.ராகுல், “நான் இருக்கிறேன்” என்று சொல்லாமல் சொல்லி தனது வாழ்நாளின் சிறந்த இன்னிங்ஸை விளையாடினார். 92 பந்துகளை எதிர்கொண்ட அவர், 11 பவுண்டரிகள் மற்றும் ஒரு சிக்சருடன் 112 ரன்களைக் குவித்தார். அவருக்குத் துணையாக ஜடேஜா (27) மற்றும் நிதிஷ்குமார் (20) ஆகியோர் பங்களிக்க, இந்திய அணி 50 ஓவர்கள் முடிவில் 7 விக்கெட் இழப்பிற்கு 284 ரன்கள் என்ற சவாலான இலக்கை நிர்ணயித்தது.
Daryl Mitchell 3rd ODI century vs India: இந்திய பந்துவீச்சைச் சிதறடித்த கிவிஸ்!
285 ரன்கள் எடுத்தால் வெற்றி என்ற இலக்குடன் களம் புகுந்த நியூசிலாந்து அணிக்கு ஆரம்பத்திலேயே அதிர்ச்சி காத்திருந்தது. கான்வே மற்றும் ஹென்றி நிக்கோலஸ் ஆகியோர் சொற்ப ரன்களில் ஆட்டமிழக்க, அந்த அணி 46 ரன்களுக்கு 2 விக்கெட்டுகளை இழந்து தவித்தது. ஆனால், அதன் பிறகு கைகோர்த்த வில் யங் மற்றும் டேரல் மிட்செல் ஜோடி, ஆட்டத்தின் போக்கை அப்படியே மாற்றியது.
இந்த ஜோடியைப் பிரிக்க முடியாமல் இந்தியப் பந்துவீச்சாளர்கள் திணறினர். மூன்றாவது விக்கெட்டுக்கு இந்த இணை 162 ரன்களைச் சேர்த்துப் பாறை போல நின்றது. வில் யங் 87 ரன்கள் எடுத்து ஆட்டமிழந்தாலும், மறுமுனையில் நங்கூரம் பாய்ச்சி நின்ற டேரல் மிட்செல் அபாரமாகச் சதம் விளாசி அணியை வெற்றிப் பாதைக்கு அழைத்துச் சென்றார். இறுதியில் 47.3 ஓவர்களிலேயே நியூசிலாந்து அணி 3 விக்கெட்டுகளை மட்டுமே இழந்து இலக்கை எட்டியது. இந்தியத் தரப்பில் ஹர்சித் ராணா, குல்திப் யாதவ் மற்றும் பிரசித் கிருஷ்ணா தலா ஒரு விக்கெட்டை வீழ்த்தினர்.
இந்திய அணியின் தோல்விக்கு முக்கியக் காரணமாகப் பந்துவீச்சாளர்கள் நடுவரிசை விக்கெட்டுகளை எடுக்கத் தவறியது பார்க்கப்படுகிறது. குறிப்பாக, ராஜ்கோட் போன்ற பேட்டிங்கிற்குச் சாதகமான ஆடுகளத்தில் 284 ரன்கள் என்பது போதுமானதாக அமையவில்லை. அடுத்ததாக நடைபெறும் மூன்றாவது ஒருநாள் போட்டி தொடரைத் தீர்மானிக்கும் இறுதிப் போட்டியாக (Decider) மாறியுள்ளதால் ரசிகர்கள் மத்தியில் எதிர்பார்ப்பு அதிகரித்துள்ளது.
ஓப்பனிங்ல சதம் அடிக்கிறது ஒரு விஷயமா? விராட் கோலியை மீண்டும் வம்பிழுத்த சஞ்சய் மஞ்ச்ரேக்கர்!
