KL Rahul 8th ODI century: நியூசிலாந்து அணிக்கு எதிரான இரண்டாவது ஒருநாள் போட்டியில், இந்திய அணியின் நட்சத்திர வீரர் கேஎல் ராகுல் தனது விஸ்வரூப ஆட்டத்தை வெளிப்படுத்தியுள்ளார். அணியின் டாப் ஆர்டர் பேட்ஸ்மேன்கள் அடுத்தடுத்து சொற்ப ரன்களில் ஆட்டமிழந்து தடுமாறிய வேளையில், மிடில் ஆர்டரில் நங்கூரம் பாய்ச்சி நின்று சதம் விளாசிய கேஎல் ராகுல், இந்திய அணி ஒரு கௌரவமான ஸ்கோரை எட்ட முக்கியக் காரணமாக அமைந்தார்.
குறிப்பாக, இந்திய அணியின் தலைமை பயிற்சியாளர் கவுதம் கம்பீர், ராகுலின் இந்த ஆட்டத்தைக் கண்டு பெவிலியனில் நீண்ட நேரம் எழுந்து நின்று கைதட்டிப் பாராட்டியது மைதானத்தில் இருந்த அனைவரையும் ஆச்சரியத்தில் ஆழ்த்தியது. கம்பீர் பொதுவாக வீரர்களை எளிதில் பாராட்டாதவர் என்ற நிலையில், ராகுலுக்கு அவர் கொடுத்த இந்த சிக்னல், ராகுல் மீதான நம்பிக்கையை மேலும் அதிகரித்துள்ளது.
இந்திய அணியின் மிடில் ஆர்டரில் ராகுலின் இடம் குறித்துப் பல விமர்சனங்கள் எழுந்து வந்த நிலையில், இந்தப் போட்டியில் அவர் காட்டிய ‘வித்தை’ அனைவரது வாயையும் அடைத்துள்ளது. 2026 உலகக்கோப்பைக்கான உத்தேச அணியில் ராகுலின் பங்களிப்பு எவ்வளவு முக்கியமானது என்பதை இந்த இன்னிங்ஸ் மீண்டும் ஒருமுறை நிரூபித்துக் காட்டியுள்ளது.
தடுமாறிய இந்தியா.. தாங்கிப் பிடித்த ராகுல்: மிரட்டலான 8-வது ஒருநாள் சதம்!
டாஸ் வென்று முதலில் பேட்டிங் ஆடிய இந்திய அணிக்கு ஆரம்பமே அதிர்ச்சியாக அமைந்தது. அதிரடியாக ஆடிய சுப்மன் கில் 56 ரன்களில் வெளியேற, ரோகித் சர்மா மற்றும் விராட் கோலி (23 ரன்கள்) ஆகியோர் அடுத்தடுத்து விக்கெட்டுகளைப் பறிகொடுத்தனர். 21.3 ஓவர்களில் 3 விக்கெட்டுகளை இழந்து இந்திய அணி தடுமாறிக் கொண்டிருந்த போது கேஎல் ராகுல் ஐந்தாவது வீரராகக் களமிறங்கினார்.
தொடக்கத்தில் மிகவும் நிதானமாக ஆடிய ராகுல், ஜடேஜாவுடன் இணைந்து விக்கெட் விழாமல் பார்த்துக் கொண்டார். சுமார் 10 ஓவர்களாக ஒரு பவுண்டரி கூட வராத நிலையில், ராகுல் அந்த வறட்சியை உடைத்தார். முதல் 35 ரன்களை எடுக்க அதிக பந்துகளைச் எடுத்துக் கொண்டாலும், அதன்பிறகு அவரது பேட்டிங்கில் அதிரடி கூடியது. 52 பந்துகளில் தனது அரைசதத்தை எட்டிய அவர், பின்னர் டெய்லண்டர்களுடன் இணைந்து அணியின் ஸ்கோரை உயர்த்தினார்.
நிதிஷ் குமார் மற்றும் ஹர்சித் ராணா ஆகியோருக்குத் தகுந்த ஆலோசனைகளை வழங்கி, 46-வது ஓவருக்குப் பிறகு ஆட்டத்தின் மொத்தக் கட்டுப்பாட்டையும் தனது கைக்குள் கொண்டு வந்தார். கைல் ஜேமிசன் வீசிய ஃபுல் டாஸ் பந்தை லாவகமாகச் சிக்சருக்குப் பறக்கவிட்டு, 92 பந்துகளில் தனது 8-வது ஒருநாள் சதத்தைப் பூர்த்தி செய்தார். 112 ரன்கள் எடுத்த நிலையில் ஆட்டமிழந்த ராகுல், இந்திய அணி 284 ரன்களை எட்டப் பேருதவி புரிந்தார்.
KL Rahul 8th ODI century: கம்பீர் கொடுத்த அந்த ‘ஸ்பெஷல்’ சிக்னல்!
இந்த இன்னிங்ஸிற்கு முன்பு கேஎல் ராகுலின் ஒருநாள் சராசரி 49.95 ஆக இருந்தது. தற்போது இந்தச் சதத்தின் மூலம் அவரது சராசரி 51-ஆக உயர்ந்துள்ளது. ஒருநாள் கிரிக்கெட்டில் 50-க்கும் மேல் சராசரி வைத்திருக்கும் விராட் கோலி போன்ற ஜாம்பவான்களின் பட்டியலில் தற்போது ராகுலும் இணைந்துள்ளார். இது அவரது பேட்டிங் திறமைக்குக் கிடைத்த மிகப்பெரிய அங்கீகாரமாகும்.
ராகுல் ஆட்டமிழந்து பெவிலியன் நோக்கித் திரும்பிய போது, பயிற்சியாளர் கவுதம் கம்பீர் இருக்கையில் இருந்து எழுந்து நின்று நீண்ட நேரம் கைகளைத் தட்டினார். ராகுலின் பொறுப்பான ஆட்டம் கம்பீருக்கு மிகுந்த மனநிறைவைத் தந்துள்ளதை அந்தச் செயல் காட்டியது. “ராகுல் அணியின் முதுகெலும்பாகச் செயல்படுகிறார்” என்ற சிக்னலை கம்பீர் இதன் மூலம் தேர்வாளர்களுக்கு உணர்த்தியுள்ளார்.
மிடில் ஆர்டரில் ஒற்றை ஆளாக நின்று நியூசிலாந்து பந்துவீச்சாளர்களைச் சோதித்த ராகுலின் இந்த இன்னிங்ஸ், சமூக வலைதளங்களில் வைரலாகி வருகிறது. விமர்சனங்களுக்குப் பேச்சால் பதில் சொல்லாமல், தனது பேட்டால் பதிலடி கொடுக்கும் ராகுலின் இந்த பாணி ரசிகர்களை வெகுவாகக் கவர்ந்துள்ளது.
