நடிகர் விஜய் தனது முதல் தேர்தலிலேயே வெற்றி பெற்று தமிழக முதல்வராக பொறுப்பேற்றுள்ள நிலையில், மக்கள் அவரது அரசியல் அனுபவத்தைப் பார்த்து வாக்களிக்கவில்லை என்றும், அவரது சினிமா புகழைப் பார்த்தே வாக்களித்துள்ளார்கள் என்றும் நடிகை ரோஜா செல்வமணி விமர்சித்துள்ளார்.
விஜய் தேர்தல் களத்தில் தொகுதி வாரியாகச் சென்று மக்கள் குறைகளை முழுமையாகக் கேட்கவில்லை என்பதைச் சுட்டிக்காட்டிய அவர், ஆட்சிக்கு வந்து வெறும் 120 நாட்களே ஆவதால், அவரது செயல்பாடுகளை முழுமையாக மதிப்பிட குறைந்தபட்சம் ஆறு மாத காலமாவது அவகாசம் அளிக்க வேண்டும் என்று தெரிவித்துள்ளார்.
முதல்வர் பதவியேற்ற குறுகிய காலத்திலேயே, நரேந்திர மோடிக்குப் பிறகு விஜய் அடுத்ததாக நாட்டின் பிரதமராக வருவார் என அவரது ரசிகர்கள் சமூக வலைதளங்களில் தீவிரமாகப் பேசி வருகின்றனர். இது குறித்து ரோஜாவிடம் எழுப்பப்பட்ட கேள்விக்கு, ஆட்சிக்கு வந்த உடனேயே இதைப் பற்றி கணிப்பது சாத்தியமற்றது என அவர் யதார்த்தமாகப் பதிலளித்துள்ளார்.
விஜய் முதலில் தமிழக முதல்வராகத் தன்னை நிலைநிறுத்தி, சிறந்த நிர்வாகத்தைக் கொடுத்து சாதித்துக் காட்ட வேண்டும் என்றும், குறைந்தபட்சம் ஓராண்டு காலமாவது அவரது ஆட்சியைக் கவனித்த பிறகே பிரதமர் பதவி குறித்தெல்லாம் பேச முடியும் என்றும் அவர் திட்டவட்டமாகக் கூறியுள்ளார்.
தற்போது முதல்வரின் செயல்பாடுகள் அனைத்தும் திரைப்படப் பாணியில் ‘ரீல்ஸ்’ போன்று சமூக வலைதளங்களில் உலா வருவதாகப் பலரும் விமர்சித்து வருவதை ரோஜாவும் சுட்டிக்காட்டியுள்ளார். நிஜமான நிர்வாகத் திறனை வெளிப்படுத்துவதை விட, பின்னணி இசையுடன் கூடிய சினிமா பாணியிலான அணுகுமுறையே அதிகம் தென்படுவதாக அவர் விமர்சித்துள்ளார்.
மேலும், தமிழகத்தைத் தாண்டி கேரளா, கர்நாடகா என அவசரப்பட்டு கட்சியை விரிவுபடுத்துவது தேவையற்றது என்றும் அவர் அறிவுறுத்தியுள்ளார். பிரகாஷ் ராஜ், லதா ரஜினிகாந்த் உள்ளிட்ட பிற பிரபலங்களும் விஜய்யின் நிர்வாகத்தை மதிப்பிட அவருக்குக் கால அவகாசம் தேவை என்ற கருத்தையே முன்வைப்பது குறிப்பிடத்தக்கது.
