சிஎஸ்கே நிர்வாகத்தை வறுத்தெடுத்த சேவாக்! 2-வது ஓவரிலேயே இம்பாக்ட் பிளேயர் மாற்றத்திற்கு கடும் எதிர்ப்பு! ஐபிஎல் 2026 தொடரில் சென்னை சூப்பர் கிங்ஸ் அணி சந்தித்து வரும் தொடர் சரிவுகள் குறித்து இந்திய அணியின் முன்னாள் அதிரடி மன்னன் வீரேந்தர் சேவாக் தனது பாணியில் மிகக் கடுமையான விமர்சனங்களை முன்வைத்துள்ளார்.
குறிப்பாக, குஜராத் அணிக்கு எதிரான போட்டியில் சிஎஸ்கே கையாண்ட ‘இம்பாக்ட் பிளேயர்’ உத்தி முற்றிலும் முட்டாள்தனமானது என அவர் சாடியுள்ளார். அணியின் மோசமான பேட்டிங் வரிசையைச் சரிசெய்ய ஒரு பந்துவீச்சாளரைத் தியாகம் செய்தது சிஎஸ்கே-வுக்குப் பேரிடியாக அமைந்திருப்பதாக அவர் குறிப்பிட்டுள்ளார்.
சிஎஸ்கே நிர்வாகத்தை வறுத்தெடுத்த சேவாக் – சேவாக் கேள்வி
நேற்றைய ஆட்டத்தில் ஆரம்பத்திலேயே விக்கெட்டுகள் சரிந்ததால், சிஎஸ்கே நிர்வாகம் 2-வது ஓவரிலேயே சர்பராஸ் கானை இம்பாக்ட் பிளேயராகக் களமிறக்கியது. இது குறித்துப் பேசிய சேவாக், “உலகில் எங்குமே இவ்வளவு சீக்கிரமாக இம்பாக்ட் பிளேயரைப் பயன்படுத்தி நான் பார்த்ததே இல்லை. சர்பராஸ் கானை விளையாட வைக்க வேண்டும் என்று நினைத்தால், அவரை நேரடியாக ‘ஸ்டார்ட்டிங் லெவன்’ (Starting XI) அணியிலேயே சேர்த்திருக்கலாமே? எதற்காக ஒரு பந்துவீச்சாளரை வீணடிக்க வேண்டும்?” எனத் தனது அதிருப்தியை வெளிப்படுத்தினார்.
பந்துவீச்சாளர் இல்லாதது தற்கொலைக்குச் சமம்
இந்தத் தவறான முடிவால் சிஎஸ்கே அணி ஒரு முக்கிய பந்துவீச்சாளரை இழந்தது. இது குறித்துக் கோபமாகப் பேசிய சேவாக், “இந்த மாதிரியான ஆடுகளத்தில் ஒரு கூடுதல் பந்துவீச்சாளர் இல்லாமல் விளையாடுவது தற்கொலைக்குச் சமம்.
12 பந்துகளில் 32 ரன்கள் எடுத்த சர்பராஸ் கானின் அதிரடி அணிக்கு உதவியிருக்கலாம், ஆனால் ஒரு பவுலரை இழந்துவிட்டு 158 ரன்களைத் தடுப்பது என்பது இயலாத காரியம். சிஎஸ்கே மேனேஜ்மென்ட்டின் இந்த முடிவெடுக்கும் திறன் எனக்குப் புரியவே இல்லை,” என வேதனை தெரிவித்தார்.
ருதுராஜ் இல்லையென்றால் 80 ரன்கள் தான்!
அணியின் ஒட்டுமொத்த செயல்பாட்டைக் குறை சொன்னாலும், கேப்டன் ருதுராஜ் கெய்க்வாட்டின் போராட்டத்தை சேவாக் வெகுவாகப் பாராட்டினார். “அணியின் விக்கெட்டுகள் ஒருபுறம் சீட்டுக்கட்டாய் சரிந்தபோது ருதுராஜ் மட்டும் நின்று ஆடவில்லை என்றால், சிஎஸ்கே அணி 80 அல்லது 90 ரன்களுக்கே ஆல்-அவுட் ஆகியிருக்கும். அவர்தான் அணியைத் தோளில் சுமந்து ஒரு கௌரவமான ஸ்கோரை எட்ட உதவினார்,” எனப் புகழ்ந்தார்.
விராட் கோலி போன்ற ஜாம்பவான்கள் 9000 ரன்களைக் கடந்து புதிய சரித்திரம் படைத்து வரும் வேளையில், ஐபிஎல் வரலாற்றின் வெற்றிகரமான அணியான சிஎஸ்கே இத்தகைய அடிப்படைத் தவறுகளைச் செய்வது ரசிகர்களிடையே பெரும் கவலையை ஏற்படுத்தியுள்ளது.
