தென்னாப்பிரிக்காவை கதறவிட்ட வைபவ் சூர்யவன்ஷி! 10 சிக்ஸர்கள்.. 74 பந்தில் 127 ரன்கள் விளாசி சாதனை!
தென்னாப்பிரிக்க மண்ணில் இந்திய இளம் வீரர் வைபவ் சூர்யவன்ஷி நடத்தி வரும் ரன் வேட்டை கிரிக்கெட் உலகையே உற்று நோக்க வைத்துள்ளது. வெறும் 14 வயதேயான ஒரு சிறுவன், சர்வதேச அளவில் அனுபவம் வாய்ந்த பந்துவீச்சாளர்களைச் சிதறடித்து வரும் விதம் இந்திய கிரிக்கெட்டின் அடுத்த “சூப்பர் ஸ்டார்” இவர்தான் என்பதை உறுதிப்படுத்துகிறது.
தென்னாப்பிரிக்கா ‘ஏ’ அணிக்கு எதிரான 3-வது யூத் ஒருநாள் போட்டியில் வைபவ் ஆடிய ஆட்டம் அசுரத்தனமானது. டாஸ் வென்று முதலில் பந்துவீசிய தென்னாப்பிரிக்க அணிக்கு, வைபவ் தனது பேட்டின் மூலம் தகுந்த பதிலடி கொடுத்தார். 14 வயதில் இவ்வளவு முதிர்ச்சியான, அதே சமயம் அதிரடியான ஆட்டத்தை யாரும் எதிர்பார்த்திருக்க மாட்டார்கள்.
தொடக்க வீரராகக் களமிறங்கிய வைபவ், மைதானத்தின் அனைத்து திசைகளிலும் பந்துகளைப் பறக்கவிட்டார். வெறும் 63 பந்துகளில் தனது சதத்தைப் பூர்த்தி செய்த அவர், மொத்தமாக 74 பந்துகளில் 127 ரன்களைக் குவித்தார். இதில் 9 பவுண்டரிகள் மற்றும் 10 இமாலய சிக்ஸர்கள் அடங்கும். இவரது ஸ்ட்ரைக் ரேட் 170-க்கும் அதிகமாக இருந்தது ஒருநாள் போட்டியில் வியக்கத்தக்க ஒன்றாகப் பார்க்கப்படுகிறது.
மற்றொரு தொடக்க வீரரான ஆரோன் ஜார்ஜ் உடன் இணைந்து வைபவ் அமைத்த பார்ட்னர்ஷிப், தென்னாப்பிரிக்க அணியின் பந்துவீச்சை நிலைகுலையச் செய்தது. முதல் விக்கெட்டுக்கு இந்த ஜோடி வெறும் 25.4 ஓவர்களில் 227 ரன்களைக் குவித்தது. வைபவ் கொடுத்த அதே வேகத்தை ஆரோன் ஜார்ஜும் தொடர, இந்திய அணி மிகப்பெரிய ஸ்கோரை எட்டியது.
வைபவ் சூர்யவன்ஷிக்கு இது இரண்டாவது மிரட்டல் இன்னிங்ஸ் ஆகும். இதற்கு முந்தைய போட்டியிலும் வெறும் 24 பந்துகளில் 10 சிக்ஸர்களுடன் 68 ரன்களை விளாசி இந்திய அணியின் வெற்றியை உறுதி செய்திருந்தார். ஒருநாள் தொடரில் டி20 வேகத்தில் விளையாடும் இவரது ஆட்டம் தென்னாப்பிரிக்க ஊடகங்களாலும் பெரிதும் பாராட்டப்பட்டு வருகிறது.
விரைவில் தொடங்கவுள்ள 2026 ஐசிசி யு-19 உலகக் கோப்பைத் தொடருக்கு முன்னதாக வைபவ் இத்தகைய ஃபார்மில் இருப்பது இந்திய அணிக்கு மிகப்பெரிய பலமாகும். ஏற்கனவே 5 முறை சாம்பியன் பட்டம் வென்ற இந்திய அணிக்கு, இந்த முறை வைபவ் சூர்யவன்ஷி ஒரு முக்கிய துருப்புச் சீட்டாக இருப்பார் என்பதில் ஐயமில்லை.
ஆயுஷ் மத்ரே தலைமையிலான இந்திய அணி தற்போது முழு உத்வேகத்துடன் உள்ளது. ஜனவரி 15-ம் தேதி அமெரிக்காவுக்கு எதிரான உலகக் கோப்பை முதல் போட்டியில் வைபவ் இதே அதிரடியைத் தொடர்வார் என்று ரசிகர்கள் ஆவலுடன் காத்திருக்கின்றனர். இளம் வயதிலேயே இத்தகைய சாதனைகளைச் செய்யும் வைபவ், இந்திய கிரிக்கெட்டின் எதிர்காலத் தூணாகக் கருதப்படுகிறார்.
சூர்யா ஃபார்ம் அவுட்! கில் அவுட்! – அகர்கர் செய்த சம்பவத்தால் ஹர்பஜன் சிங் ஷாக்!
