வெஸ்ட் இண்டீஸ் அணிக்கு எதிரான 2-வது டி20 போட்டிக்கு முன்னதாக, ராஞ்சியில் நடைபெற்ற வலைப்பயிற்சியில் வைபவ் சூர்யவன்ஷி சிக்சர் மழை பொழிந்து அனைவரையும் வியப்பில் ஆழ்த்தியுள்ளார். மைதானத்தில் காவலுக்கு நின்ற போலீசாரும் இவரது ஆட்டத்தை பார்த்து வாயடைத்துப் போன காட்சி அரங்கேறியது.
இந்தியா மற்றும் வெஸ்ட் இண்டீஸ் அணிகள் மோதும் 2-வது டி20 போட்டி ராஞ்சியில் உள்ள சர்வதேச மைதானத்தில் நடைபெறுகிறது. இப்போட்டிக்கான இந்திய அணியின் தீவிர பயிற்சி முகாம் நேற்று நடைபெற்றது.
முதல் போட்டியில் சஞ்சு சாம்சன் தொடக்க வீரராகக் களமிறங்கியதால், ஆடும் லெவனில் வைபவ் சூர்யவன்ஷிக்கு வாய்ப்பு கிடைக்கவில்லை. ஆனால் ராஞ்சியில் வலைப்பயிற்சியில் பேட்டிங் செய்ய இறங்கிய அவர் தனது அதிரடி பேட்டிங்கால் ஒட்டுமொத்த மைதானத்தையும் திரும்பிப் பார்க்க வைத்தார்.
இந்திய பந்துவீச்சாளர்களின் பந்துகளை சற்றும் இரக்கமின்றி மைதானத்தின் மேற்கூரைகளுக்கும் கேலரிகளுக்கும் பறக்கவிட்டார். பந்துகள் அடுத்தடுத்து பத்திரிகையாளர் அறை அருகே விழுந்தன.
15 வயதிலேயே துளியும் பயமின்றி பந்துகளை பவுண்டரிக்கு விரட்டிய அவரது அதிரடியைக் கண்டு மைதானத்தில் நின்றிருந்த போலீசார், செய்தியாளர்கள் மற்றும் ரசிகர்கள் வாயடைத்துப் போனார்கள்.
அதேபோல் தனது சொந்த ஊரில் களமிறங்கும் அதிரடி விக்கெட் கீப்பர் இஷான் கிஷனும் அருகிலிருந்த வலையில் போட்டியாக அதிரடி ஆட்டம் ஆடினார். சுழற்பந்து வீச்சாளர்களான ரவி பிஷ்னோய், நமன் திர், அபிஷேக் சர்மா ஆகியோரின் பந்துகளை சிக்சர்களாகப் பறக்கவிட்டார்.
கடந்த ஆண்டு சையத் முஷ்டாக் அலி கோப்பை இறுதி ஆட்டத்தில் 49 பந்துகளில் 101 ரன்கள் குவித்து ஜார்க்கண்ட் அணிக்கு கோப்பையை வென்று தந்தவர் இஷான் கிஷன் என்பது குறிப்பிடத்தக்கது.
அவருக்கு அருகில் சஞ்சு சாம்சனும் நீண்ட நேரம் தீவிர பயிற்சியில் ஈடுபட்டார். ராஞ்சி போட்டியில் வைபவ் சூர்யவன்ஷிக்கு ஆடும் லெவனில் வாய்ப்பு கிடைக்காவிட்டாலும் கூட, வலைப்பயிற்சியில் அவர் காட்டியுள்ள அதிரடி இந்திய அணி நிர்வாகத்திற்கு புதிய தலைவலியை ஏற்படுத்தியுள்ளது. இதனால் பிளேயிங் லெவனில் வைபவ் சேர்க்கப்படுவாரா? என்ற எதிர்பார்ப்பு எழுந்துள்ளது.
