Indian ODI Squad changes for 2027 World Cup: சஞ்சு சாம்சனின் அதிரடியால் அதிரும் பிசிசிஐ! 2027 உலகக்கோப்பையில் மிகப்பெரிய மாற்றம்! இந்திய கிரிக்கெட் அணியின் விக்கெட் கீப்பர் பேட்ஸ்மேன் இடத்திற்கு எப்போதும் நிலவி வரும் போட்டி, தற்போது உச்சகட்டத்தை எட்டியுள்ளது. குறிப்பாக 2026 ஐபிஎல் தொடரில் சஞ்சு சாம்சன் காட்டி வரும் விஸ்வரூபம், ரிஷப் பண்ட்டின் ஒருநாள் போட்டி எதிர்காலத்திற்கு முற்றுப்புள்ளி வைக்கும் நிலையை உருவாக்கியுள்ளது.
2027 ஒருநாள் உலகக் கோப்பைத் தொடருக்கான திட்டமிடலை இந்திய அணி இப்போதே தொடங்கிவிட்ட நிலையில், தேர்வுக்குழுவின் கவனம் சஞ்சு சாம்சன் பக்கம் திரும்பியுள்ளது ரசிகர்களிடையே பெரும் வரவேற்பைப் பெற்றுள்ளது.
Indian ODI Squad changes for 2027 World Cup: சாம்சனின் அசுரத்தனமான வேட்டை
நடப்பு ஐபிஎல் தொடரில் சென்னை சூப்பர் கிங்ஸ் அணிக்காக விளையாடி வரும் சஞ்சு சாம்சன், ஒவ்வொரு போட்டியிலும் தனது திறமையை நிரூபித்து வருகிறார். எதிரணி பந்துவீச்சாளர்களைத் திணறடிக்கும் சாம்சன், இதுவரை ஆடிய 7 போட்டிகளில் 2 பிரம்மாண்ட சதங்களை விளாசி 293 ரன்களைக் குவித்துள்ளார்.
இவரது சராசரி 58.60 மற்றும் ஸ்ட்ரைக் ரேட் 178.65 என்பது ஒரு உலகத்தரம் வாய்ந்த வீரரின் அடையாளமாகப் பார்க்கப்படுகிறது. ஆனால், மறுபுறம் ரிஷப் பண்ட் பார்ம் இன்றி தவித்து வருகிறார். 7 போட்டிகளில் வெறும் 147 ரன்கள் மட்டுமே எடுத்துள்ள பண்ட், தனது பழைய அதிரடியை வெளிப்படுத்த முடியாமல் திணறுவது அணி நிர்வாகத்திற்கு கவலையை அளித்துள்ளது.
தென்னாப்பிரிக்க மண்ணும் 2027 உலகக்கோப்பைப் போரும்
2027 ஒருநாள் உலகக் கோப்பை தென்னாப்பிரிக்காவில் நடைபெற உள்ளதால், அங்கிருக்கும் வேகப்பந்து வீச்சுக்குச் சாதகமான ஆடுகளங்களில் சிறப்பாகச் செயல்படும் வீரர்களே அணிக்குத் தேவை. புள்ளிவிவரங்களின்படி பார்த்தால், சஞ்சு சாம்சன் ஒருநாள் போட்டிகளில் 56.66 என்ற அபாரமான சராசரியைக் கொண்டுள்ளார்.
குறிப்பாக தென்னாப்பிரிக்க மண்ணில் அவர் ஆடிய 2 இன்னிங்ஸ்களிலேயே 120 ரன்கள் எடுத்து அசத்தியுள்ளார். ஆனால் ரிஷப் பண்ட்டின் ஒருநாள் போட்டி சராசரி 33.50 மட்டுமே என்பது குறிப்பிடத்தக்கது. இந்த ஒப்பீடு சாம்சனுக்கே சாதகமாக இருப்பதால், தேர்வுக்குழுவினர் ஒருநாள் அணியில் பண்ட்டுக்குப் பதிலாக சாம்சனைத் தேர்வு செய்யத் தீவிரமாக ஆலோசித்து வருகின்றனர்.
ரசிகர்களின் கோரிக்கை மற்றும் தேர்வுக் குழுவின் சவால்
சமூக வலைதளங்களில் சஞ்சு சாம்சனுக்கு ஆதரவான அலை வீசி வருகிறது. பண்ட்டைத் டெஸ்ட் போட்டிகளுக்கு மட்டும் பயன்படுத்திக் கொண்டு, ஒருநாள் மற்றும் டி20 போட்டிகளில் சாம்சனுக்கு நிரந்தர இடம் வழங்க வேண்டும் என கிரிக்கெட் விமர்சகர்கள் கருத்துத் தெரிவிக்கின்றனர்.
சாம்சனின் தற்போதைய ஃபார்ம் மற்றும் தென்னாப்பிரிக்க ஆடுகளங்களில் அவருக்கு உள்ள சாதகமான ரெக்கார்டுகள், அவரை இனி புறக்கணிக்க முடியாத நிலையை உருவாக்கியுள்ளன. 2027 உலகக்கோப்பை கனவை நனவாக்க இந்திய அணியில் இந்த அதிரடி மாற்றம் நிகழ்வது உறுதியாகத் தெரிகிறது.
