நாகர்கோவிலைச் சேர்ந்த யூடியூபர் மதுமிதா பணம், நகைகளைக் காண்பித்து வீடியோ பதிவிடுவது வழக்கம். குழந்தைக்கு பண குளியல் நடத்துவது, நகைகள் வாங்க செல்வது என அனைத்தையும் வீடியோவாகப் பதிவிட்டுவந்தார்.
இந்த நிலையில் நாகர்கோவில் வி.ஐ.பி கார்டனில் உள்ள மதுமிதா வீட்டில் இருந்து சுமார் 118 சவரன் நகை கொள்ளையடிக்கப்பட்ட சம்பவம் அரங்கேறியது. அந்த வழக்கில் தூத்துக்குடியைச் சேர்ந்த லாரி டிரைவர் இசக்கி பாண்டி உள்பட 4 பேரை ராஜாக்கமங்கலம் போலீஸார் கைது செய்தனர். அவர்களிடம் இருந்து 98 சவரன் நகைகள் மீட்கப்பட்டன.
மதுமிதாவின் வீடியோக்களைப் பார்த்து அவரது வீட்டை அடையாளம் கண்டு நகைகளைக் கொள்ளையடித்ததாக கைதானவர்கள் தெரிவித்தனர். இந்த நிலையில் திருநெல்வேலியைச் சேர்ந்த ஒப்பந்ததாரரிடம் 5 சவரன் நகை திருடியதாக மதுமிதா மீதுவழக்குப்பதிவு செய்யப்பட்டுள்ளது.
திருநெல்வேலி கே.டி.சி நகர் பகுதியைச் சேர்ந்த பில்டிங் காண்ட்ராக்டரான பேச்சிமுத்து என்பவர் நாகர்கோவில் யூடியூபர் மதுமிதா மீது திருட்டு புகார் அளித்துள்ளார். பேச்சிமுத்துவின் புகாரில் கூறப்பட்டுள்ளதாவது:
முதுகுவலிக்காக பிசியோ தெரபி சிகிச்சைக்காக அடிக்கடி திருநெல்வேலி செல்வது வழக்கம். அப்போது, நாகர்கோவில் தம்பத்துகோணம் பகுதியைச் சேர்ந்த யூடியூபர் மதுமிதா அறிமுகமானார். அவர் அடிக்கடி செல்போனில் பேசுவார்.
கடந்த 2022-ம் ஆண்டு திருநெல்வேலி நீதிமன்றம் பகுதியில் உள்ள பேருந்து நிறுத்தத்திற்கு வருமாறும், தன்னை அவசரமாகப் பார்க்க வேண்டும் என்றும் மதுமிதா கூறினார். அங்கு சென்றபோது மதுமிதா எனது காரில் ஏறினார். அதன் பிறகு என்னிடம் பிசியோதெரபி செய்துகொள்ளும்படி கூறினார். ஆனால் எனக்கு அதில் விருப்பம் இல்லை என்று கூறிவிட்டேன்.
பின்னர் அவரை நெல்லை பேருந்து நிலையத்தில் இறக்கிவிட்டு எனது வீட்டிற்குச் சென்றுவிட்டேன். வீட்டில் சென்று பார்த்தபோது எனது கழுத்தில் கிடந்த 5 பவுன் நகை காணாமல் போயிருந்ததைக் கண்டு அதிர்ச்சியடைந்தேன். இது பற்றி மதுமிதாவிடம் கேட்டபோது, உன்னால் முடிந்ததைப் பார்த்துக் கொள் என்று மிரட்டிவிட்டு சென்றுவிட்டார்.
மேலும், இது தொடர்பாகப் புகார் செய்தால் தன்னை அவதூறாகப் பேசி அசிங்கப்படுத்தி விடுவேன் என்று மிரட்டியதால், அப்போது புகார் அளிக்காமல் இருந்துவிட்டேன். எனவே தற்போது புகாரளிக்கிறேன், என அந்த மனுவில் கூறியிருந்தார்.
ஒப்பந்ததாரரின் புகாரின் அடிப்படையில் ராஜாக்கமங்கலம் போலீஸார் மதுமிதா மீது வழக்குப்பதிவு செய்துள்ளனர். பேச்சிமுத்து ராஜாக்கமங்கலம் காவல் நிலையத்தில் புகார் அளித்திருந்தாலும், சம்பவம் திருநெல்வேலி மாவட்டத்திற்கு உட்பட்ட பகுதியில் நடந்துள்ளதால், இந்த வழக்கை மேல் நடவடிக்கைக்காக திருநெல்வேலி மாவட்டத்திற்கு மாற்ற போலீஸார் நடவடிக்கை மேற்கொண்டு வருகின்றனர்.
